لسة جديد

كلمة عادية وممكن تتقال كتير ، على اي حد وفي اي شئ يعني مثلا اول مرة تروح مكان تشتغل فيه تلاقي ناس بتقلك انت لسة جديد وناس تانية تسئلك انت لسة جديد ؟ 
 احياناً بتكون كناية مفيدة خاصة في موضوع الشغل .. لكن في اشياء ثانية لو اتقالك فيها لسة جديد بتبقا بايخة يعني مثلا لما تيجي تتجوز (ماحدش يفهمني غلط) وعشان اظاهر اني اتفهمت غلط يبقا مش هاكمل باقي المثال . 
وانتقل على مثال آخر غير موضوع الجواز مع اني لسه بس ننقل.. مثلا في النادي ولسة قاعد تخبط في الاماكن منتا لسة جديد   ومش  عارف , كذلك الامر في الجامعة ، مع انها  ممكن تشفعلك لو غلطة لكن لو مثلا كنت لسة جديد في شغلانة وعملت غلط قدام زبون ياحظك المعفن دا يبقا يوم نحسك هاتطلع عليك سمعة وماحدش هايجي يعمل عندك حاجة ثاني ،، ويقولولك ياعم سيبك من فلان  دا لسة جديد .

وكأن ماحدش من البشر كان جديد قبل كدا طب ما كل واحد مننا كان جديد في يوم من الايام في المكان الي فيه او في العمارة او في النادي او في العمل المهم انه كان جديد , كلمة انت لسة جديد اول ما تسمعها من شخص تشعر ان هذا الشخص اتولد قديم او اول ما نزل من تيييت امه اتوجد  في الوظيفة دي او العمارة دي  واحلا حاجه بقا انه اول ما يقلك انت لسة جديد ، يبتدي يحكيلك عن مغامراته سنة 60 ومغامرات جده الفرعون  خزاعة ابن شنقيط في المكان  .

 المشكلة اننا اتعودنا على اننا ما نراعيش شعور بعض وبقينا متعودين على كدا  مافيش اي احساس بالغير ، بس بتضطر  انك تتعامل مع البشر زي ما بيعاملوك  .

اللي يمييز البني ادم في موضوع القديم والجديد هوا مدى اتزانه وثباته الانفعالي في المكان وفي تصرفاته بتعطي الشخص وسام الاقدمية وحتى الثبات بيبقا صعب في ظل ضغط نفسي رهيب عليك  

عشان كدا اغلب الشباب ليلة الدخلة بيبقو لسة جداد وبيفضحونا ..

دمتم بود....

مش هايجيبوها لبر

في البداية موقف الاخوان المسلمين مخجل فعلا ولا يدل على حرية الفكر ولا الدميوقراطية الحقيقة 

فالكذب والتدليس واخفاء الحقائق عن الاناس البسطاء يعني الخيانة لاناس كل ذنبها انها كانت

في عهد البضين محمد حسني مبارك بتقوله اخترناه وبايعناه كان مجرد ما ياخد فترة  رئاسية تانيه يبعهم زي ما بايعوه

غيوم مستقرة وسحابات من الظلم والفساد كانت مستقرة فوق السماء المصرية كانت تحجب النور عن الكثير والكثير من ابناء هذه البلد

التي طالما انهكت من الكذب والخداع والطمع والجشع وعندما سقط سحس وسقط جزء قليل جدا من نظامه المتعفن 

انكشفت الغمة وذهبت الغيوم والسحب لفترة قليلة لا تتعدى الشهر حتى عاد الاخوان البزرميط ليحشدو قاذورتاهم وحرقها حتى تسبب 

سحبا  فوق مصر تحجب التعقل والتفكير عن اهل بني بلدي  وكم اشعر  بالحزن والاسى عندما رأيت بني  ديني المسلمين وهم كالقطيع يذهبون الى الانتخابات لكي يقولون نعم عند في المسيحيين فإنك تشعر بالاحباط الشديد واليأس ،، ولكنك عندما تعرف ان الاخوان هم من نصحو وناشدو الناس بان يوقولو نعم عشان المسيحين ما ياخدوش البلد منكم تكتشف الفاجعة هو انك امام خائن آخر غير سحس مبارك 

الكلام يطول ولكن ينتهي  دائما عند علامات تعجب وواستفهام ؟؟!! الى متى وكيف ولماذا وعشان ايه ؟ 

عموما هم مش  جديد عليهم 

دمتم بود ..

الاخوان والسلفية والبزرميط واديني في الهايف وانا احبك يا ننس

انا قررت اربي دقني واخبط دماغي في الحيط اربع مرات عشان اطلع علامة صلاة وفي نفس ذات الوقت ابتدي اذاكر تاني لغة عربية عشان اقوي نفسي في اللغة تاني  ومش هاتكلم باللكنة الصعيدية ولا البحرية تاني واقول ( امر امير الامراء بتحريك السارية السادسه) علشان ازبط  اللغه العربية كويس  واروح ضارب البنطلون المعفن القصير  وامسك سواك واحسس الناس اني اخوان او سلفي 

وفي نفس البطيخة ( السياق) مش هاروح اصلي الفجر في الجامع علشان المرحومة امن الدولة ماتراقبنيش  وبليل اسمع اغاني واشرب حشيش واقلك ليه لا يا صلاح  والصبح في الشغل تلاقيني لابس عباية التقوى واضرب عيني من تحت ابص على مؤخراة المزز وامنع نفسي من الكلام مع بعض السيدات الفاضلات زي علية سوست وتشينا شقلباز وبكدا ومرة في الاسبوع اضرب الكلبية اللزيزة والطاقية الظريفة واحسسك اني استاذ تقوى وايمان  ....

ناس هاتزعل مني في الكلام الي قلته بل احتمال كبير يحلو دمي ويكفروني ،،، ايون يكفروني ويقلولك من وجد منك جعبور ابن فزاعة فليقتله فلقد كفر . سؤال لولبي بيطرح نفسة على الترابيزة ؟؟  لييييييييييييييييييييه؟ ليه انا بقيت بزرميط وكافر؟؟ 

وقلي انت مين علشان تكفرني ؟؟؟ 

بص ياض : تبقا محترم وتسمعني اسمعك وتبقى صحبي وحبيبي وكفائه تغلط ياريت انسلك شعر دقنك شعرة شعرة 

قصر الكلام لان كترة بينفخ البطن  لما اعاملك كويس عاملني كويس لما اعاملك وحش عاملني وحش احترمتك احترمني 

انت مش احسن مني وانت ما اخدتش الرخصة من ربنا ان حضرتك منزه من الخطاء وان كل افعالك صواب 

ولا هوا كل من ربا دقن دخل الجنة على رأي ضابط امن دولة (يابني انت فاكر نفسك هاتدخل الجنة اللي هايدخلو الجنة 10 واساميهم موجودة في الورق قصادي اهو )  وطالما ضباط امن الدولة الله يرحمهم  ويسامحهم ويحسن اليهم  قالو ان الي هايدخلو الجنة 10 وانت مش منهم يبقا تلم نفسك وبلاش عباية الدين عشان بتشوه الدين  بطريقتك دي الله ياخدكم مليتو البلد 

انا قبل ما اكتب البوست دا ب 5 ساعات بزبط ماكنتش باقول كدا خالص لكن حصل موقف اثبتلي ان الوسخ لو دخلته في حاجه ولو حتى عصرت عليه لمونة هايفضل وسخ 

دمتم بود ..

Xbox 360-Wii -Playstation 3-Pc في الاسواق لعبة الثورة

الي حصل بيشبه بلعبة فيديو جيم اول مرحلة بنلاعب عساكر الامن

وبعدها بنلاعب الضباط وبعدها نلاعب ضباط امن الدولة

 وبعد ان نتغلب على ضباط امن الدولة نلاعب بلطجية امن الدولة وكل مرحله بتزيد صعوبة اللعبة  وبعدها تتعرض لخيانة  من الوزراء الخونة  وتتسارع احداث اللعبة حتى تلاعب عمر سليمان وبعديها تدخل في معركة كبيرة مع جمال مبارك  والاخير

يخرج جريح من المعركة لم يتم القضاء عليه كاملا متوعدا بان يعود مرة اخرى

 لينتقم في الجزء الثاني من اللعبة وبعد ان يهرب جمال  ويسقط مساعده احمد عزفي

الاسر تتجه الى قصر الرئيس مبارك وعند دخول المعركة معه تسمع  صوت ضحكاته العالية المستفزة  

 وعندما تجهز عليه يظهر لك بانه ملاك وديع يحاول استعطافك وحين تمد يد العون له يقوم بطعنك طعنة غادرة  فتقاوم وتقضي عليه

وفي نهاية اللعبة يظهر لك جمال مبارك  يتحدث هاتفيا ويتوعد بالعودة مره اخرا لكن بشكل اخر لينتقم ....

اوجه الاختلاف بين التعديلات الدستورية والمتاهات والترقيع لاسمح الله

يقال ان التعديلات الدستورية هيا عبارة عن ترقيع لما هوا فقد  تيييييت شرعيته اقصد ماحدش يفهمني صح المهم 

يوم ما اتعدل الدستور انا كنت نايم قمت على تلفون من صديق بيقولي الدستور اتعدل وبقي فلة  قلتله تمام,, 

وطبعا كل واحد فينا بيفكر في الشيئ المتوهه والمقلق له بسرعة البرق سئلته هل عدلو صلاحيات الرئيس وقامو بفصل السلطات 

اجابني بلا  قلتله طب اقفل  ..

في مثال ضربته بيحصل عندنا  الا وهوا : ان الشاب الحليوة الامور وهوا في الصف الثالث الثانوي  بيبقا شخصيته كويسة ولطيفة وامورة تعالى بقا في ثالث سنة ليه في كلية الشرطة تجد شخصا اخر تماما يختلف  عن ما كان عليه السؤال الوجيه بقا ؟؟ لييييه ؟ ايوه لييه ياحلوين ؟ الاجابة : بسم الله الرحمن الرحيم تونس .

 الاجابة ان الشاب دا بيلاقي نفسه في مكان يعطيه وضع اجتماعي ويقنع من فيه ان هذا المكان يجعلك فوق 1-القانون 2- فوق البشر يعني راكبهم براحتك 3- ان الكل يتمنا ىان يقيم علاقات معه لانه سوف يسهل لهم خدمات فيما بعد .

تعالو بقا نحوش كل المميزات الزائده عن طالب كلية الشرطة او ضابط الشرطة ستجد انه فقد انيابة وفقد تكبره وعجرفته وايضا فقد المنافقين الذين دائما ما يهللون ويسبحون بحمد الضابط 

عشان كدا انا باقول لا في التعديلات الدستورية القادمة لانها لم تقلل من صلاحياة خنيق (رئيس) الجمهورية ...

حسني مبارك كويس ياجماعة مش وحش ..

 مقولة سمعتها ،، وكانت دائما ما تصيبني بالخنقة والضيق من صاحبها لدرجةاني لو شفته في شارع امشي من الشارع الثاني

كنت في جلسة مع اصدقاشي وخطرت ببالي فكرة : ياجماعة حسني مبارك ممكن يتشال على الاعناق ويبقا بطل قومي ,,

اصحابي : ازاي ؟؟ قلتلهم ممكن حسني يعمل حركة جدعنة ويرجع الفلوس الي سرقها كلها لخزانة الدولة او يسدد ديون مصر




وبكدا يكسب تعاطف الناس وثقتهم ,, اصدقائي وبكل ثقة : طب وهوا هايرضى يثبت على نفسه انه حرامي ؟؟ اكيد لا مش هايرضى وهايماطل لانه مش ممكن يثبت على نفسة انه كدا .

الي انا واثق منه ان الناس متيقنة ان سحس مبارك مستحيل يرجع الفلوس طيب سؤال واقف في زوري بالعرض وخانقني !!


هل مافيش حد عاقل يهمه مصلحة البلد موجود في عيلة مبارك يقله ياالي كنت رئيس رجع فلوس الناس واعمل خير في حياتك قبل ما ربنا ياخدك ونخلص منك ؟؟ السؤال الثاني هل مافيش عاقلين في عيلة آل مبارك كلها يقدر يقله انت حرامي ياسحس ؟

مبارك اثبت وبكل جدارة انه مثال للرجل التيييييييت لانه لازم يحسن صورته قبل ما يموت ونخلص منه !

انا مش مستغرب قوي لان الشخص الي يجيله واساتذة جامعات وناس حاصلة على جايزة نوبل وتقوله ياحسني اعمل تحول ديمقراطي دي فرصة تاريخية ليك عشان تدخل بيها الجغرافية يقلهم : انا لاعايز ادخل كيمياء ولا احياء ...




دمتم بود

 بسم الله الرحمن الرحيم 

اللي هايدخل المدونة دي  انا في بالي اعمل مدونة اكتب فيها ما يدور بذهني وذلك منذ 4 اعوام مضت لكن لم تأتي فرصة لذلك 

اعتقد اني تأخرت ولكن ليس كثيرا  اسم المدونة متاهات (متاهة متاهة ) تاكيد لفظي  هاتكلم فيها عن المتاهات واللعبكة وافكر فيها بصوت عالي  في ذهني كلام كثير اتمنا ان استمر في الكتابة وان لا يبعدني اي شيء عن الكتابة والمتابعة والقرائة دمتم بود ...